Vërshimet në Rahovec kërkojnë angazhim urgjent institucional për minimizimin e dëmeve

06.01.2026

Situata e krijuar nga vërshimet e fundit në territorin e komunës së Rahovecit vlerësohet si serioze, ndërsa kërkohet angazhim i menjëhershëm i të gjitha instancave, nga ato komunale deri te institucionet shtetërore, me qëllim minimizimin e dëmeve dhe ofrimin e ndihmës për banorët e prekur.

Reshjet e dendura kanë shkaktuar daljen e ujërave nga shtrati në disa zona, duke dëmtuar shtëpi, infrastrukturë rrugore dhe toka bujqësore. Sipas vlerësimeve fillestare, përveç faktorëve natyrorë, në përkeqësimin e situatës kanë ndikuar edhe problematika të akumuluara ndër vite, si projektimet e papërshtatshme të shtretërve të lumenjve, ndërtimet pranë tyre, si dhe infrastruktura rrugore e vendosur pa planifikim adekuat.

Njohës të çështjeve lokale theksojnë se, ndonëse fenomenet natyrore nuk mund të parandalohen, një pjesë e dëmeve mund të ishin evituar përmes planifikimit më të mirë urban dhe zbatimit rigoroz të kritereve ndërtimore nga institucionet përgjegjëse.

Në këtë fazë, theksohet se prioritet mbetet veprimi konkret në terren dhe ofrimi i ndihmës për qytetarët e prekur nga vërshimet, ndërsa deklaratat dhe debatet duhet t’i lënë vend ndërhyrjeve emergjente dhe mbështetjes institucionale.

Autoritetet lokale kanë bërë të ditur se situata po monitorohet, ndërkohë që pritet koordinim më i gjerë ndërinstitucional për menaxhimin e pasojave dhe rehabilitimin e zonave të dëmtuara.