78 aksidente trafiku gjatë ditës së dielë, një me fatalitet

29.12.2025

Mosrespektimi i rregullave të komunikacionit vazhdon të mbetet një ndër shkaqet kryesore të aksidenteve të shumta që po ndodhin çdo ditë në vend.

Policia e Kosovës, përmes masave ndëshkuese dhe kontrolleve të shtuara në trafik, synon parandalimin e këtyre rasteve dhe rritjen e sigurisë rrugore.

Sipas raportit 24-orësh të Policisë së Kosovës, gjatë ditës së djeshme në vend janë regjistruar gjithsej 78 aksidente trafiku, si dhe një aksident me fatalitet. Rasti me pasoja fatale raportohet të ketë ndodhur në Ferizaj, duke shtuar edhe një herë shqetësimin për nivelin e sigurisë në komunikacion.

Në pjesën e masave ndëshkuese, Policia ka bërë të ditur se gjatë ditës së djeshme janë shqiptuar gjithsej 794 tiketa trafiku për kundërvajtje të ndryshme. Ky numër, sipas raportit, është më i ulët krahasuar me ditët e mëparshme.

Po ashtu, në kuadër të aktiviteteve policore, janë arrestuar 9 persona, ndërsa 5 prej tyre janë dërguar në mbajtje.

Policia e Kosovës vazhdon t’u bëjë thirrje qytetarëve që të respektojnë rregullat e komunikacionit, duke theksuar se vetëm përmes kujdesit dhe përgjegjësisë në trafik mund të parandalohen aksidentet dhe të mbrohet jeta e qytetarëve.