Rritet ndërgjegjësimi mbi bullizmin, profesionistët shëndetësorë trajnohen në Suharekë

21.11.2025

Në Qendrën Kryesore të Mjekësisë Familjare “Rexhep Kuqi” në Suharekë, më 18 dhe 20 nëntor 2025, u mbajt me sukses një ligjëratë profesionale mbi temën “Bullizmi”, e udhëhequr nga Arberije Kolgeci – MSc. e Infermierisë.

Ky aktivitet kishte për qëllim edukimin dhe fuqizimin e profesionistëve shëndetësorë në identifikimin, parandalimin dhe menaxhimin e formave të bullizmit.

Në ligjëratë morën pjesë një numër i madh i infermierëve, mamive dhe profesionistëve të tjerë shëndetësorë, të cilët patën mundësinë të diskutojnë rreth llojeve të ndryshme të bullizmit, ndikimit të tij në shëndetin mendor, si dhe rëndësisë së identifikimit dhe ndërhyrjes së hershme. Aktiviteti shërbeu si një platformë për ndarjen e përvojave profesionale dhe zgjidhjeve praktike për trajtimin e rasteve të bullizmit.

Qendra Kryesore e Mjekësisë Familjare – Suharekë falënderon të gjithë pjesëmarrësit për interesimin dhe angazhimin e tyre, duke theksuar se institucioni do të vazhdojë të organizojë aktivitete edukative që kontribuojnë në ngritjen profesionale të stafit dhe në mirëqenien e komunitetit.

Bullizmi konsiderohet çdo formë sjelljeje e qëllimshme dhe e përsëritur që synon të dëmtojë, frikësojë ose nënçmojë një person tjetër. Ai mund të shfaqet në forma të ndryshme, duke përfshirë bullizmin fizik, verbal, social dhe atë online. Pasojat e tij mund të ndikojnë ndjeshëm në shëndetin mendor, duke shkaktuar ankth, depresion, ulje të vetëbesimit dhe probleme në performancën akademike apo profesionale.

Institucionet shëndetësore luajnë një rol kyç në identifikimin e hershëm të shenjave të bullizmit, ofrimin e mbështetjes emocionale dhe referimin tek specialistët e duhur. Parandalimi i bullizmit kërkon angazhim nga të gjithë, duke filluar nga edukimi i fëmijëve dhe të rriturve, promovimi i respektit dhe empatisë, dhe krijimi i ambienteve të sigurta në shkolla, komunitet dhe online.