Sot varrosen dy vëllezërit e vrarë në Malishevë

07.11.2025

Driton dhe Naim Morina, dy vëllezërit që humbën jetën tragjikisht në fshatin Gollubovc të Malishevës, do të varrosen sot nga ora 16:00, njoftuan familjarët e tyre përmes rrjeteve sociale.

Ngjarja e rëndë ka tronditur komunitetin lokal dhe ka tërhequr vëmendjen e Policisë së Kosovës. Sipas informacioneve zyrtare, dy vëllezërit dyshohet se janë vrarë nga dhëndri i tyre, Astrit Isufi, i cili u arrestua nga Policia e Kosovës dhe aktualisht po trajtohet në Qendrën Klinike Universitare të Kosovës (QKUK) për plagët që dyshohet t’i ketë marrë gjatë ngjarjes.

Policia ka bërë të ditur se hetimet lidhur me këtë rast janë duke vazhduar nën mbikëqyrjen e Prokurorisë, me qëllim të zbardhjes së plotë të ngjarjes dhe ndëshkimit të përgjegjësve.

Ngjarja e dhimbshme rikujton rëndësinë e ndërhyrjes së shpejtë të autoriteteve dhe nevojën për kujdes në situata konfliktuale brenda familjeve, pasi mosmarrëveshjet familjare mund të përfundojnë tragjikisht.