Incident zjarri në Suharekë, digjen kabllo elektrike në një kompleks banesor
Një incident zjarri është raportuar mbrëmjen e kaluar në rrugën “Gjergj Fishta” në Suharekë, ku disa kabllo elektrike janë përfshirë nga flakët brenda një lokali që ndodhet në kuadër të një kompleksi banesor.
Sipas informacioneve të Policisë së Kosovës, zjarrfikësit kanë ndërhyrë me shpejtësi dhe kanë arritur të shuajnë zjarrin, duke parandaluar përhapjen e tij në pjesët e tjera të objektit.
Rrethanat e ngjarjes mbeten ende të paqarta. “Lidhur me rastin, përveç prokurorit është informuar KEDS-i dhe eksperti i zjarreve. Rasti është duke u hetuar”, thuhet në përgjigjen e Policisë, raporton KALLXO.com.
Nuk raportohet për persona të lënduar, ndërsa dëmet materiale pritet të vlerësohen nga autoritetet përkatëse. Hetimet janë në zhvillim për të zbardhur shkakun e saktë të zjarrit.