Ilir Daja triumfon në Kupën e Shqipërisë pas dramës së penalltive ndaj Egnatias
Dinamo City është shpallur fituese e Kupës së Shqipërisë për sezonin aktual.
Në një finale emocionuese dhe të luftuar, skuadra e drejtuar nga trajneri Ilir Daja mposhti Egnatian pas ekzekutimit të penalltive.
Ndeshja e zhvilluar në stadiumin kombëtar u mbyll në kohën e rregullt me rezultat të barabartë 2-2, duke i dhuruar spektatorëve një përballje plot tension dhe gola. Megjithatë, ishin penalltitë ato që vendosën fituesin e trofeut, ku Dinamo City u tregua më e saktë, duke triumfuar me rezultatin 5-4.
Ky trofe shënon suksesin e parë të Ilir Dajës në krye të Dinamo City-t, vetëm disa muaj pasi mori drejtimin e ekipit. Daja u largua nga Ballkani në shtatorin e vitit të kaluar dhe tashmë ka arritur të udhëheqë Dinamon drejt një titulli të rëndësishëm në futbollin shqiptar.
Por rrugëtimi i Dinamo City-t nuk përfundon këtu. Skuadra është ende në garë për titullin e kampionit të Shqipërisë. Në gjysmëfinalen e play-offit, ata do të përballen me Vëllazninë, në një tjetër sfidë që pritet të jetë mjaft interesante dhe vendimtare për ambiciet e klubit kryeqytetas. Fitorja e Kupës së Shqipërisë padyshim që do t’i japë moral dhe besim të shtuar ekipit të Ilir Dajës në ndeshjet e ardhshme.