Bizneset e vogla, afat deri më 7 prill për të siguruar furnizimin me energji elektrike me tarifa të rregullta

03.04.2025

KESCO ka njoftuar të gjitha bizneset e vogla në Kosovë se afati i fundit për të dorëzuar dokumentet e nevojshme për të vazhduar furnizimin me energji elektrike me tarifa të rregullta është të hënën, më 7 prill. Ky afat është vendimtar për bizneset që plotësojnë kriteret e përcaktuara, duke ofruar mundësinë për të shmangur kalimin në tregun e hapur të energjisë.

Sipas njoftimit të KESCO-s, bizneset e vogla që mund të përfitojnë nga ky furnizim me tarifa të rregullta janë ato që kanë më pak se 50 punëtorë dhe një qarkullim vjetor nën 10 milionë euro. Për të konfirmuar kualifikimin e tyre dhe për të vazhduar të furnizohen me tarifa të rregullta, këto biznese duhet të dorëzojnë vetëm dy dokumente thelbësore:

  • Certifikatën e biznesit me numrin unik
  • Shifrën e konsumatorit të energjisë elektrike

KESCO ka theksuar rëndësinë e dorëzimit të këtyre dokumenteve brenda afatit të caktuar për të shmangur kalimin në tregun e hapur të energjisë, ku tarifat mund të jenë më të larta dhe më të ndryshueshme.

“KESCO njofton të gjitha bizneset e vogla (më pak se 50 punëtorë dhe qarkullim nën 10 milionë euro vjetor) që afati për dorëzimin e dokumenteve të nevojshme për vazhdimin e furnizimit me energji elektrike me tarifa të rregulluara është të hënën, më 7 prill. Për të shmangur kalimin në tregun e hapur të energjisë, këto biznese duhet të dëshmojnë se mund të vazhdojnë të furnizohen me tarifa të rregulluara nga KESCO, duke dorëzuar vetëm dy dokumente: Certifikatën e biznesit me numrin unik dhe shifrën e konsumatorit të energjisë elektrike”, thuhet në njoftimin nga KESCO.