Priten anulime të fluturimeve në Aeroportin e Cyrihut, punonjësit e shërbimit tokësor hyjnë në grevë

22.08.2025

Një situatë kaotike pritet të shkaktohet sot në Aeroportin e Cyrihut, ku punonjësit e kompanisë së shërbimit tokësor Airline Assistance Switzerland (AAS) kanë shpallur grevë.

Ky vendim mund të çojë në anulime të shumta fluturimesh dhe vonesa të konsiderueshme për mijëra pasagjerë.

Greva pritet të nisë në orën 14:00, duke paralizuar operacionet për dhjetëra fluturime. Sipas gazetës zvicerane Blick, aeroporti është në dijeni të situatës dhe po ndjek me kujdes zhvillimet, transmeton urgjent.com.

Kompania AAS është përgjegjëse për shërbimet e trajtimit në tokë për disa linja ajrore, duke përfshirë Chair, Air Serbia, Eurowings, Pegasus, Lot, Air Cairo, Air Montenegro dhe GP Aviation. Sipas të dhënave të aeroportit, nga ora 14:00 deri në fund të ditës, AAS duhet të menaxhojë gjithsej 35 fluturime.

Nuk është ende e qartë se cilat fluturime specifike do të preken nga greva. Për këtë arsye, udhëtarët këshillohen të informohen drejtpërdrejt nga linjat e tyre ajrore për të marrë detaje rreth statusit të fluturimit të tyre.