Rreth 340 familje përfituan asistencë sociale në Suharekë në tremujorin e parë të vitit

17.04.2025

Gjatë tre muajve të parë të vitit 2025, programi i Asistencës Sociale në Komunën e Suharekës ka operuar brenda parametrave të normales, duke shfaqur një stabilitet të numrit të familjeve përfituese, por edhe një dinamikë të vazhdueshme të aplikimeve të reja dhe largimeve për shkak të mosriaplikimit.

Sipas të dhënave zyrtare, numri i familjeve që kanë përfituar nga Asistenca Sociale gjatë tre muajve të parë të vitit paraqitet si vijon:

  • Janar 2025: 348 familje
  • Shkurt 2025: 345 familje
  • Mars 2025: 343 familje

Këto shifra tregojnë një rënie të lehtë graduale të numrit të përgjithshëm të familjeve në asistencë, megjithatë, dinamika e aplikimeve të reja tregon një nevojë të vazhdueshme për këtë formë të mbështetjes sociale.

Gjatë periudhës janar-mars 2025, kanë aplikuar gjithsej 6 raste të reja për Asistencë Sociale. Vlen të theksohet se të gjitha këto aplikime të reja, pra 6 raste, kanë plotësuar kriteret e përcaktuara dhe janë përfshirë në program.

Në anën tjetër, gjatë kësaj periudhe janë larguar nga programi i Asistencës Sociale 5 raste për shkak të mosriaplikimit. Kjo mund të jetë rezultat i përmirësimit të gjendjes socio-ekonomike të këtyre familjeve ose arsyeve të tjera që lidhen me procedurat e programit.