Mësimdhënësit e Suharekës testojnë njohuritë e fituara në trajnimin për teknologji në arsim
Në Suharekë u zhvilluan testimet për mësimdhënësit që kishin ndjekur trajnimin “Aplikimi i programeve kompjuterike në mësimdhënie”.
Foto: Ilustrim
Ky trajnim, i organizuar nga SBASHK, ka për qëllim përgatitjen e mësimdhënësve për të integruar teknologjinë dhe platformat digjitale në procesin mësimor.
Testimi u administrua nga zyrtarët përgjegjës, Blendor Shatri dhe Afërdita Mirena, të cilët u siguruan që procesi të zhvillohej në përputhje me standardet ligjore dhe profesionale. Gjithashtu, i pranishëm gjatë testimit ishte kryetari i SKAP-it për komunën e Suharekës, Nazim Gashi.
Procesi u mbështet nga trajnerët Bahrije Elshani, Emin Hoxha dhe Kadri Hyseni, të cilët kanë luajtur një rol kyç gjatë gjithë fazës së trajnimit. Ata kanë udhëhequr grupet e mësimdhënësve duke ofruar udhëzime praktike për aplikimin e teknologjive të reja në mësimdhënie.
SBASHK ka shtrirë këtë program në shumë komuna të tjera të Kosovës, duke përfshirë grupe të shumta të mësimdhënësve anëtarë të Sindikatës. Qëllimi kryesor i këtyre trajnimeve është avancimi profesional i mësimdhënësve dhe përshtatja me kërkesat e reja të arsimit digjital.
