Laura Fazliu ndjek gjurmët e Distria Krasniqit, siguron gjysmëfinalen në Grand Prix të Austrisë
Pas suksesit të Distria Krasniqit, e cila dje fitoi medaljen e argjendtë, një tjetër xhudistë e Kosovës, Laura Fazliu, po shkëlqen në Grand Prix të Austrisë, që po zhvillohet në Linz. Garuesja jonë ka arritur të sigurojë kualifikimin në gjysmëfinale, duke treguar formë të shkëlqyer dhe vendosmëri të lartë.
Fazliu e filloi garën me një avantazh, duke kaluar raundin e parë pa luftë. Në raundin e dytë, ajo u përball me italianen Carlotta Avanzato, të cilën e mposhti me IPPON në kohën shtesë, duke treguar kështu aftësinë e saj për të triumfuar në momente vendimtare.
Në çerekfinale, Laura Fazliu u ndesh me xhudisten sllovene, Leila Mazouzi, duke e mposhtur atë me sukses dhe duke siguruar kështu vendin në gjysmëfinale. Kjo fitore e forcon edhe më shumë pozicionin e saj si një nga xhudistet më të mira të Kosovës.
Me paraqitjen e saj të shkëlqyer, Laura Fazliu po ndjek gjurmët e Distria Krasniqit, duke treguar se xhudoja kosovare po vazhdon të korrë suksese të mëdha në arenën ndërkombëtare.
