Sulm me armë zjarri në Prishtinë – një person shpëton pa lëndime, sulmuesi në arrati
Një ngjarje e rëndë ka ndodhur në orët e para të mëngjesit të së mërkurës në Prishtinë, ku një person ka shpëtuar pa lëndime pas një sulmi me armë zjarri.
Sipas Policisë së Kosovës, rreth orës 01:32 të datës 2 korrik 2025, një mashkull kosovar ka raportuar se në drejtim të tij është shtënë me armë nga një person me të cilin kishte pasur mosmarrëveshje më herët.
Falë pamjeve të kamerave të sigurisë, policia ka arritur të identifikojë të dyshuarin, i cili është larguar nga vendi i ngjarjes në një drejtim të panjohur.
Në vendin ku ndodhi sulmi janë gjetur dhe sekuestruar katër gëzhoja. Fatmirësisht, viktima ka shpëtuar pa asnjë lëndim trupor.
Rasti është duke u hetuar nga njësitet përkatëse policore, ndërsa autoritetet janë në kërkim të të dyshuarit.
