Rritet numri i familjeve me asistencë sociale në Komunën e Suharekës

Numri i familjeve me gjendje të rëndë ekonomike që marrin asistencë sociale nga buxheti i Kosovës është rreth 25 mijë e 679.

Baza e politikave sociale në Kosovë përbëhet kryesisht nga skema e ndihmës sociale, skema e pensioneve, ku përfshihen pensionet e moshës dhe kontribut-dhënëse, pensionimet e parakohshme të disa ndërmarrjeve, beneficionet për veteranët e luftës, si dhe kategori tjera sociale.

Në bazë të statistikave të ASK-së numri i familjeve që marrin asistencë sociale në Komunën e Suharekës është mbi 500.

Ndërsa, duke e krahasuar me muajt e parë të vitit, në tre muajt e fundit të 2020’ës numri i familjeve në Komunën e Suharekës të cilat marrin asistencë sociale ka pësuar rritje, raporton SuharekaOnline.

Në muajin janar numri i familjeve me gjendje të rëndë ekonomike që ka qenë rreth 500 ka pësuar rënie të lehtë gjatë muajve në vazhdim, mirëpo që nga muaji nëntor ka filluar përsëri të rritet duke e kaluar edhe shifrën e muajit të parë të vitit.

Sipas të dhënave të ASK-së, numri i familjeve në Komunën e Suharekës që marrin asistencë sociale është rritur në 517 familje me gjithsej 2.318 anëtar.