Konklavi historik nis sot në Vatikan, kardinalët votojnë pasardhësin e Papa Françeskut

Mbledhja vendimtare po zhvillohet nën afreskun madhështor të Michelangelo-s, “Gjykimi i Fundit”, brenda mureve të Kapelës Sistine.

Ky konklav konsiderohet si një nga më të veçantët dhe ndoshta më të paparashikueshmit në historinë e kohëve të fundit, duke ardhur pas vdekjes së Papa Françeskut në moshën 88-vjeçare.

Një nga trashëgimitë më të dukshme të Papa Françeskut ishte formimi i një kolegji kardinalësh të larmishëm dhe shpesh me pikëpamje të ndryshme. Brenda këtij kolegji, ka kardinalë që mbështesin vizionin e tij progresiv dhe të tjerë që dëshirojnë të rishqyrtojnë shumë nga ndryshimet që ai solli në Kishën Katolike. Kjo dinamikë e brendshme pritet ta bëjë procesin e zgjedhjes së Papës së ri veçanërisht interesant.

Termi “Konklav” e ka origjinën nga latinishtja “cum clavis”, që do të thotë “vend i mbyllur me çelës”. Ky emër simbolizon izolimin e plotë të kardinalëve gjatë procesit të zgjedhjes, ku ata mblidhen në fshehtësi të plotë, pa asnjë mundësi për të komunikuar me botën e jashtme, për të zgjedhur pasardhësin e 267-të të Shën Pjetrit. Për strehimin e tyre gjatë kësaj periudhe, kardinalët janë vendosur në Shtëpinë e Shën Martës, brenda Vatikanit.

Ndërsa kanë mbetur vetëm pak momente para fillimit zyrtar të Konklavit, pritja për të mësuar emrin e Papës së ri po rritet ndjeshëm. “Populli i Zotit” do të njoftohet për zgjedhjen e tij përmes sinjalit tradicional: tymit të bardhë që do të dalë nga oxhaku i famshëm i Kapelës Sistine. Sytë e botës janë kthyer nga Vatikani, në pritje të kapitullit të ri në historinë e Kishës Katolike.