KESCO: Rritet konsumi i energjisë, mbi 3.5 milionë euro import për dy ditë për të siguruar furnizimin
KESCO ka njoftuar se vetëm për sot dhe një pjesë të ditës së nesërme është detyruar të importojë energji elektrike me vlerë mbi 3.5 milionë euro.
Kjo ndodhi për shkak të zvogëlimit të papritur të prodhimit nga prodhuesi vendor dhe rritjes së konsumit, i cili ka arritur mbi 1100 MWh.
Në një njoftim për media, KESCO tha:
“Padyshim, që në këto rrethana kur kërkesa për konsum është më e lartë, këtë hendek mes kërkesës dhe prodhimit vendor ne duhet ta importojmë për të siguruar furnizim për konsumatorët tanë.”
Sipas të dhënave të KESCO, që nga fillimi i muajit dhjetor, kompania ka importuar mesatarisht energji elektrike me vlerë 1.5 milionë euro çdo ditë. Kjo ka qenë e domosdoshme për të mbuluar mungesat në prodhimin vendor dhe për të përmbushur kërkesat e larta të konsumit.
Përballë këtyre shpenzimeve të larta dhe sfidave me furnizimin, KESCO u ka bërë thirrje qytetarëve që të kursejnë energjinë elektrike. Kursimi konsiderohet si një masë e rëndësishme për të zvogëluar presionin mbi sistemin energjetik dhe për të shmangur rritje të mëtejshme të shpenzimeve për import.
KESCO vazhdon të monitorojë situatën dhe të punojë për të siguruar furnizimin e pandërprerë për të gjithë konsumatorët.
