Itali, arrestohen tre shtetas kosovarë për tentativë vjedhje të rëndë të bankomatit

Të arrestuarit, me banim në Gjermani, Austri dhe Kosovë, janë të njohur për autoritetet policore për krime të ndryshme kundër pronës.

Sipas informacioneve të policisë, të tre personat kishin qëndruar për disa ditë në një B&B pranë stacionit të trenit në Udine. Natën e 29 dhe 30 marsit, ata kanë udhëtuar drejt San Pietro di Cadore (Belluno) me dy automjete me targa austriake dhe zvicerane, me qëllim për të vjedhur bankomatin e degës së Volksbank.

Megjithëse kanë shkaktuar dëme të konsiderueshme në strukturën e bankomatit, ata nuk kanë arritur të marrin paratë. Pas kthimit në Udine, ata janë ndaluar nga policia në vendin e tyre të qëndrimit. Gjatë kontrollit, janë sekuestruar disa mjete, radio, një thikë me teh të gjatë dhe rreth tre mijë euro.

Gjyqtari hetues ka konfirmuar arrestimin e tyre dhe ka urdhëruar masën e sigurisë së arrestit me burg. Hetimet e policisë janë ende në vazhdim për të zbuluar detaje të tjera të mundshme të këtij rasti.