Magjia e filmit ndez Suharekën – Java e Filmit sjell art, emocion dhe kreativitet për qytetarët

16.11.2025

Suhareka këto ditë është shndërruar në një qendër të vërtetë të artit filmik, falë edicionit të radhës të Javës së Filmit, e cila po mbahet nga 14 deri më 16 nëntor. Kjo ngjarje kulturore po sjell energji, kreativitet dhe emocione për të gjithë artdashësit e komunës dhe më gjerë.

Programi i sivjetshëm është konceptuar në dy pjesë kryesore, duke ofruar një përvojë të pasur dhe gjithëpërfshirëse për të rinjtë, krijuesit dhe publikun.

Punëtoritë e filmit janë mbajtur nga artistë të mirënjohur vendorë dhe ndërkombëtarë, të cilët kanë ndarë njohuritë e tyre profesionale në fushën e filmit, regjisë, skenarit dhe producimit. Kjo ka krijuar një mundësi të rrallë për të rinjtë dhe të interesuarit të mësojnë drejtpërdrejt nga mjeshtrit e artit filmik.

Ndërkohë, çdo mbrëmje në Shtëpinë e Kulturës “Ukë Bytyçi”, publiku ka ndjekur filma të vlerësuar që janë shfaqur në festivale të ndryshme ndërkombëtare, duke sjellë një atmosferë të vërtetë kinemaje në zemër të Suharekës.

Java e Filmit në Suharekë mbyllet sot, më 16 nëntor, me një mbrëmje të dedikuar kinemasë vendore në Shtëpinë e Kulturës “Ukë Bytyçi”.
Shfaqjet fillojnë nga ora 19:00 dhe hyrja është e hapur për të gjithë qytetarët.

Në programin e natës finale do të prezantohen tre filma të autorëve kosovarë:
– “Klithma” i regjisorit Korab Lecaj
– “Kur storja vjen nga ajri” i Jon Saqipit
– “Sofra e varrit” i Mirak Zymberajt

Ky është një rast i shkëlqyeshëm për të shijuar artin vendor në ekran të madh dhe për të përjetuar emocionet që sjell krijimtaria filmike.

Java e Filmit në Suharekë dëshmon se arti jeton kur ndahet me komunitetin, duke krijuar kujtime dhe momente që mbeten gjatë.