Trump paralajmëron vendim brenda dy javësh për sulm të mundshëm ndaj Iranit

Lajmi është konfirmuar nga Shtëpia e Bardhë, e cila përmes një deklarate të lexuar nga sekretarja për shtyp, Karoline Leavitt, ka nënvizuar se presidenti Trump dëshiron që përpjekjet diplomatike të kenë një mundësi për të funksionuar para se të merret një vendim përfundimtar.

“Duke u bazuar në faktin se ekziston një mundësi e konsiderueshme për negociata që mund të ndodhin ose jo së shpejti me Iranin, unë do të marr vendimin tim nëse do të veproj brenda dy javëve të ardhshme,” thuhet në deklaratën zyrtare të presidentit.

CNN, që raporton nga burime të afërta me administratën amerikane, thekson se SHBA po monitoron nga afër situatën në rajon dhe po mban kontakte të vazhdueshme me aleatët, ndërkohë që po shqyrton opsionet e mundshme ushtarake dhe diplomatike.

Kjo deklaratë vjen në një moment kritik për Lindjen e Mesme, ku përplasjet midis Izraelit dhe Iranit kanë krijuar një atmosferë të rrezikshme, me potencial për përhapje rajonale. Një vendim i mundshëm për ndërhyrje ushtarake nga SHBA mund të ndryshojë ekuilibrin e forcave dhe të shkaktojë pasoja të gjera gjeopolitike.