Vaki shqiptare në Austri, 25 vjeçari blen monedha të falsifikuara dhe i përdor në shtëpi publike, përfundon në burg

Ngjarja, e ndodhur në korrik të këtij viti, ka tërhequr vëmendjen e publikut për natyrën e saj të pazakontë dhe detajet e habitshme që u zbuluan gjatë gjykimit.

I akuzuari Z.J., kishte blerë 17 kartëmonedha të falsifikuara prej 100 eurosh dhe përdori dy prej tyre për të paguar shërbimet në një shtëpi publike në zonën “Gürtel”. Punonjësja e argëtimit, duke përdorur një pajisje UV, vuri re se kartëmonedhat ishin false, çka çoi në arrestimin e menjëhershëm të të riut.

I akuzuari pranoi se më parë ishte dënuar për një vepër tjetër penale. Në një bisedë me gjykatësin, ai tregoi se ishte dënuar me katër vite burg në Angli, dy prej të cilave i kishte vuajtur. Ai u dënua pas një konflikti me ish-partneren e tij.

Në fillim të gjykimit, avokatja e tij mbrojtëse, Ina-Christin Stiglitz, deklaroi se klienti i saj nuk e dinte se kartëmonedhat ishin të falsifikuara, duke pretenduar se i kishte marrë si pagesë në një vend pune. Por, në mënyrë të papritur, i akuzuari pranoi fajësinë e tij gjatë procesit. Gjithashtu, u zbulua se ai kishte përdorur një dokument të falsifikuar grek për të lidhur një kontratë energjie dhe për t’u identifikuar përpara punonjësve të hekurudhave.

Kur u pyet për burimin e kartëmonedhave të falsifikuara, ai deklaroi:

“Një turk që jeton në të njëjtën zonë si unë m’i dha ato.”
Megjithatë, ai nuk e njihte identitetin e vërtetë të personit, por premtoi se nëse do ta takonte përsëri, do ta denonconte në polici.

Bazuar në pranimin e fajësisë dhe provat e siguruara, gjykata e dënoi shtetasin shqiptar Z. J. me dy vite burg, prej të cilave tetë muaj janë të detyrueshme. Kur u pyet për mundësinë e dëbimit nga Austria pas përfundimit të dënimit, gjykatësi sqaroi se kjo nuk ishte në juridiksionin e tij për momentin.