Identifikohen përmes ADN-së tre anëtarë të Grupit të Intelektualëve të zhdukur gjatë luftës në Kosovë
Tre anëtarë të Grupit të Intelektualëve, Adem Ademi, Fatmir Fazliu dhe Ali Haliti, janë identifikuar përmes analizave të ADN-së, pas zhvarrosjes së mbetjeve mortore në Kalludër dhe Jabukë.
Lajmin e ka bërë të ditur kryeministri i Kosovës, Albin Kurti, përmes një postimi në Facebook, duke njoftuar se Komisioni Qeveritar për Persona të Zhdukur ka pranuar raporte të reja të ADN-së, mbi bazën e të cilave është bërë identifikimi i tre personave.
Sipas Kurtit, Adem (Fazli) Ademi, Fatmir (Bajram) Fazliu dhe Ali (Islam) Haliti ishin intelektualë dhe veprimtarë të çështjes kombëtare, të cilët në prillin e vitit 1999 u rrëmbyen nga forcat e armatosura serbe dhe u zhdukën me dhunë.
Ai ka bërë të ditur se Komisioni Qeveritar, së bashku me institucionet përkatëse, tashmë i ka njoftuar familjet e tyre për identifikimin.
Kurti ka shprehur ngushëllimet për familjet, duke theksuar se zbardhja e fatit të personave të zhdukur me dhunë mbetet prioritet i Qeverisë së Kosovës.
Ai gjithashtu ka kërkuar drejtësi për krimet e kryera gjatë luftës, duke akuzuar Serbinë për vazhdimin e mohimit dhe fshehjes së tyre, si dhe për mbylljen e dokumenteve dhe arkivave që lidhen me këtë periudhë.
