Dhuna në familje, sfidë për institucionet e Kosovës – raportohen 44 raste brenda një jave
Gjatë periudhës 14 – 21 nëntor 2025, Zyra për Mbrojtje dhe Ndihmë të Viktimave, e cila funksionon në kuadër të Zyrës së Kryeprokurorit të Shtetit, ka trajtuar 51 raste të reja në nivel të Republikës së Kosovës.
Këto raste përfshijnë kryesisht dhunë në familje, por edhe incidente të tjera serioze si dhunim, keqpërdorim seksual i të miturve, bashkëjetesë nën moshën 16 vjeç, krime lufte dhe tentime për dhunim.
Gjatë kësaj periudhe, zyra ka përgatitur dhe dorëzuar 6 kërkesa për Urdhër Mbrojtje në gjykatë, si dhe 13 kërkesa për Urdhër Mbrojtje Emergjente, ndërsa janë iniciuar gjithashtu dy kërkesa për ndërprerje të urdhërit të masës. Përveç përkujdesjes ndaj rasteve konkrete, stafi ka dhënë 64 këshilla juridike, ka marrë pjesë në 82 seanca gjyqësore dhe 15 seanca në prokurori, duke siguruar mbrojtje dhe ndihmë ligjore për viktimat.
Në këtë periudhë janë marrë gjithashtu 15 aktvendime të aprovuara, ndërsa janë shpallur 12 aktgjykime dënuese, një aktgjykim lirues dhe një aktgjykim refuzues. Përveç kësaj, zyra ka përfaqësuar rastet edhe në polici dhe strehimore, duke garantuar ndihmë dhe mbrojtje të plotë për viktimat, dhe ka bërë 6 referime të rasteve te QPS. Një rast ka përfunduar gjithashtu me kërkesë për kompensim nga fondi për viktima.
Ky raport tregon angazhimin e vazhdueshëm të Zyrës për Mbrojtje dhe Ndihmë të Viktimave në përkujdesjen ndaj qytetarëve të Kosovës që kanë përjetuar dhunë ose keqpërdorim, duke ofruar mbështetje ligjore, psikologjike dhe sociale në mënyrë profesionale dhe të koordinuar me institucionet relevante.