E turpshme, i vjedh paratë një 71-vjeçari në Gjermani, kosovarja kapet në Aeroportin e Prishtinës

09.09.2025

Një ngjarje e pazakontë dhe e turpshme ka ndodhur ditën e dielë në aeroportin e Memmingenit në Gjermani, ku një pasagjere i ka vjedhur disa qindra euro një personi tjetër, ndërsa të dy po kalonin në kontrollin e sigurisë.

Sipas njoftimit zyrtar të policisë kufitare të Memmingenit, një pasagjer 71-vjeçar ka denoncuar vjedhjen e parave të tij të gatshme, ndërsa po kontrollonte identitetin dhe bagazhin e tij të dorës.

Ngjarja ka ndodhur në zonën e kontrollit, ku pamjet e kamerave të sigurisë konfirmuan vjedhjen. Por, hajdutja ishte arratisur. Një grua 59-vjeçare me origjinë nga Kosova, por me vendbanim në Gjermani, kishte marrë paratë nga ndarja e bagazhit të pasagjerit dhe i kishte futur në çantën e saj, shkruan urgjent.com.

Fatkeqësisht për të, ajo ishte nisur menjëherë me fluturimin e saj drejt Prishtinës, duke menduar se do të shpëtonte pa u ndëshkuar. Megjithatë, policia gjermane nuk e la me kaq. Ajo kontaktoi menjëherë policinë e aeroportit të Prishtinës, duke i dhënë të gjitha detajet e nevojshme.

Me të mbërritur në Prishtinë, policia e aeroportit ndaloi menjëherë gruan e dyshuar dhe konfirmoi identitetin e saj. Ajo është një 59-vjeçare nga Kosova, e cila jeton në Gjermani. Pas konfirmimit të identitetit, procedura ligjore do të vazhdojë me autoritetet përgjegjëse.