Përmbytjet në Teksas: 67 të vdekur, përfshirë 21 fëmijë

06.07.2025

Të paktën 67 persona kanë humbur jetën si pasojë e përmbytjeve katastrofike që goditën Teksasin pas reshjeve të dendura që ranë të premten, në Ditën e Pavarësisë së SHBA-së.

Mes viktimave janë 21 fëmijë, ndërsa kërkimet për 11 vajza dhe një këshilltare nga një kamp veror në afërsi të lumit Guadalupe vazhdojnë ende në ditën e tretë.

Larry Leitha, sherifi i Qarkut Kerr – zona më e goditur nga fatkeqësia – tha se vetëm në këtë qark janë konfirmuar 59 viktima, përfshirë fëmijët. Ai shtoi se ka edhe 22 persona të paidentifikuar, përfshirë 18 të rritur dhe 4 fëmijë, por nuk është e qartë nëse ata përfshihen në shifrën e përgjithshme të të vdekurve.

Përmbytjet u shkaktuan nga një stuhi e papritur që solli deri në 38 cm shi, duke përmbytur zona të tëra në Texas Hill Country, rreth 140 km në veriperëndim të San Antonios. Lumi Guadalupe doli nga shtrati, duke marrë me vete çadra kampingu, makina dhe struktura të përkohshme.

Në qarqe të tjera situata mbetet po ashtu kritike:

  • Në Qarkun Travis, u konfirmuan 4 viktima dhe 13 të zhdukur.
  • Në Qarkun Kendall, raportohet 1 viktimë.
  • Qarku Burnet njoftoi për dy të vdekur.
  • Në qytetin San Angelo në Qarkun Tom Green, një grua u gjet e vdekur në makinën e saj të përmbytur.

Deri më tani, më shumë se 850 persona janë shpëtuar, disa prej të cilëve ishin kapur pas pemëve për të shpëtuar nga vërshimi i ujit.

Sherifi Leitha theksoi se “të gjithë në komunitet po vuajnë” dhe se përmasat e tragjedisë janë të pashembullta për rajonin.

Agjencia Federale e Menaxhimit të Emergjencave (FEMA) është vënë në veprim dhe ka vendosur burime shtesë në ndihmë të ekipeve të shpëtimit, pasi Presidenti Donald Trump shpalli gjendje të madhe fatkeqësie në shtet. Edhe Roja Bregdetare amerikane është angazhuar me helikopterë dhe avionë për ndihmë në zonat më të rrezikuara.

Ndërkohë, disa ekspertë kanë ngritur shqetësime nëse shkurtimet në agjencitë federale të motit dhe emergjencave nën administratën Trump mund të kenë ndikuar në mungesën e paralajmërimeve efektive për përmbytjet, duke e lënë popullsinë të papërgatitur për përmasat e katastrofës.

Kërkimet për të zhdukurit dhe operacionet e ndihmës janë ende në vijim, ndërsa autoritetet paralajmërojnë se numri i viktimave mund të rritet në ditët në vijim.