Ballkani u eliminua nga Zalgiris me rezultat të përgjithshëm 2-1 në kuadër të rrethit të parë kualifikues në Ligën e Kampionëve.

Këtë eliminim të Ballkani e ka komentuar edhe trajneri i njohur kosovar, Granit Begolli.

Begolli ka theksuar se vendimet e trajnerit Ilir Daja e kanë befasuar atë, duke nisur nga rreshtimi dhe përzgjedhja në formacionin titullar.

Ai tha se te Ballkani në qendër të sulmit ishte një futbollist që ka qenë i huazuar te Malisheva. Futbollist që nuk e ka pasur në skuadër gjashtë muaj e ta vendosësh titullar në garat evropiane sipas tij këtu ka qenë rreziku i parë.

“Më befasoi trajneri Ilir Daja në të dyja ndeshjet e Ballkanit me rreshtimin që ka bërë e sidomos te vendosja e futbollistëve në fushë. Nuk e kam kuptuar zgjedhjen e tij pikërisht në ndeshjen e parë. Te Ballkani në qendër të sulmit kam parë një futbollist që ka qenë i huazuar të Malisheva.

Një futbollist që nuk e ke pasur në skuadër gjashtë muaj ta vendosësh titullar në garat evropiane edhe me i besu “çelsat” e sulmit, këtu ka qenë rreziku i parë”, tha Begolli në emisionin Ekipi A në ATV.

Ai ka thënë se zgjedhjet e tij nuk i ka kuptuar, edhe pse ka shtuar se te Ballkani pikë të fortë e ka parë pikërisht trajnerin Ilir Daja, kjo si shkak i eksperiencës që ka pasur në të kaluarën.

“Zgjedhjet e tij nuk i kam kuptu. Edhe pse unë pikë të fortë te Ballkani e kam parë pikërisht trajnerin Ilir Daja për shkak të eksperiencës që e ka pasur në të kaluarën”, shtoi ai.