Tragjedi në Itali, 18-vjeçari shqiptar humb jetën në një aksident rrugor

Viktima është identifikuar si Olsi Pezi, vetëm 18 vjeç, i cili ndodhej në sediljen e pasagjerit të një automjeti tip Mercedes, që drejtohej nga vëllai i tij 24-vjeçar, raporton platforma urgjent.com.

Ngjarja ndodhi rreth orës 01:30 të mëngjesit më 7 shtator. Sipas raportimeve, Mercedesi ku udhëtonin dy vëllezërit rrëshqiti dhe u përplas fillimisht me parmakun mbrojtës, në anën tjetër të rrugës. Në atë moment, në drejtim të kundërt po vinte një Peugeot i drejtuar nga një infermiere 23-vjeçare nga Sabaudia, e cila nuk mundi të shmangte përplasjen.

Goditja rezultoi fatale për 18-vjeçarin shqiptar, i cili u gjend në pikën e kontaktit të dy mjeteve. Ekipet mjekësore e nxorën nga rrënojat, por nuk mundën të bënin asgjë për ta shpëtuar, duke shpallur vdekjen në vendngjarje.

Vëllai i viktimës, i cili drejtonte Mercedesin, ka shpëtuar me lëndime të lehta. Ndërkohë, infermierja 23-vjeçare u dërgua në spitalin “Fiorini” të Terracinës me fraktura në dorë dhe këmbë. Të dy shoferët iu nënshtruan testeve të drogës dhe alkoolit, si pjesë e procedurave standarde hetimore.

Në vendngjarje ndërhynë menjëherë Policia e Autostradave Aprilia, Brigada e Zjarrfikësve të Terracinës dhe ekipet e emergjencës.

Për shkak të aksidentit, rruga shtetërore SS7 “Raccordo/A” e Porto Badinos u mbyll përkohësisht në të dyja drejtimet, në seksionin mes kilometrave 0.000 dhe 0.953. Trafiku u devijua në rrugë alternative, me sinjalistikë të vendosur nga autoritetet.

Gazeta italiane ANAS konfirmoi në një deklaratë se “aksidenti, për arsye që aktualisht janë duke u hetuar, përfshiu dy automjete pas një përplasjeje ballore, ku një person humbi jetën”. Forcat e rendit dhe personeli i ANAS mbetën në vendngjarje deri në mëngjes për të sqaruar rrethanat dhe për të rivendosur qarkullimin.

Hetimet për shkaqet e saktë të ngjarjes janë ende në zhvillim, ndërsa autoritetet pritet të publikojnë detaje të reja në ditët në vijim.