Itali, dy shqiptarë të arrestuar për trafik droge – kokaina u gjet e fshehur në pusetë pranë banesës

02.07.2025

Dy shtetas shqiptarë janë arrestuar nga karabinierët italianë në Campagnano di Roma, si rezultat i një operacioni antidrogë të zhvilluar natën e 26 qershorit 2025.

Të dyshuarit, të moshës 38 dhe 41 vjeç, u kapën në flagrancë teksa po shpërndanin lëndë narkotike të llojit kokainë në qendrën historike të qytetit.

Njëri prej shqiptarëve u ndalua në momentin kur po i shiste një sasi droge një qytetari. Menjëherë pas ndalimit, forcat e rendit kaluan në një kontroll të imtësishëm të banesës, ku shfaqën dyshime për zhurma të pazakonta që vinin nga banjoja.

Karabinierët lokalizuan burimin e zhurmës dhe kontrolluan dy puseta në afërsi të shtëpisë, ku u gjetën katër doza kokainë të gatshme për tregti. Substanca narkotike dyshohet se ishte hedhur me nxitim në sistemin e kanalizimeve në përpjekje për të fshehur provat.

Pas gjetjes së drogës, të dy shqiptarët u arrestuan dhe u dërguan menjëherë për gjykim të drejtpërdrejtë në të njëjtën ditë.

Ky operacion është pjesë e një fushate më të gjerë të karabinierëve të Stacionit të Campagnano di Roma për luftimin e trafikut të drogës dhe shpërndarjes së saj në rrugët e qytetit. Gjatë muajit qershor, autoritetet kanë raportuar gjithashtu tetë persona në Prefekturën lokale si përdorues të substancave narkotike – përfshirë edhe dy të mitur – dhe kanë sekuestruar sasi të konsiderueshme hashashi dhe marihuane.

Autoritetet italiane theksojnë se, sipas ligjit, të arrestuarit konsiderohen të pafajshëm deri në një vendim të formës së prerë nga gjykata. Hetimet janë ende në vazhdim për të zbardhur rrjetin e plotë të shpërndarjes së drogës dhe lidhjet e mundshme të të dyshuarve me grupe të tjera kriminale.