Protesta masive në Berlin kundër politikës së re të migracionit të CDU-së
Qindra njerëz janë mbledhur përpara selisë së partisë CDU në Berlin për të protestuar kundër politikës së re të migracionit të propozuar nga lideri i partisë, Friedrich Merz.
Foto: Ilustrim
Kjo politikë e re ka për qëllim kthimin e shumë emigrantëve në kufijtë e Gjermanisë dhe ka tërhequr kritika të shumta, pasi u miratua vetëm me mbështetjen e partisë së ekstremit të djathtë, Alternativa për Gjermaninë (AfD).
Protesta u zhvillua pas një sulmi të kohëve të fundit me thikë nga një azilkërkues i refuzuar afgan, i cili vrau një burrë dhe një djalë të vogël. Ky sulm nxiti Merz të vërë migrimin në qendër të vëmendjes dhe të paraqesë dy mocione në parlament që kërkonin masa të shtuara të sigurisë dhe mbylljen e kufijve tokësorë gjermanë ndaj migrimit të parregullt.
Njëri nga mocionet, ai që favorizonte më shumë refuzime të azilkërkuesve në kufijtë e Gjermanisë, u miratua falë mbështetjes së partive opozitare, përfshirë AfD-në. Kjo ka rritur tensionet politike në Gjermani, pasi CDU ka deklaruar më parë se nuk do të bashkëpunojë me AfD-në.
Mbështetja e propozimeve të Merz nga e djathta ekstreme ka ngritur shqetësime serioze për të ardhmen e politikës gjermane, veçanërisht pasi zgjedhjet parlamentare janë vetëm disa javë larg. Sondazhet tregojnë se Unioni i qendrës së djathtë të Merzit kryeson me rreth 30% mbështetje, ndërsa AfD është e dyta me rreth 20%.
