KRU “Hidroregjioni Jugor” nis aksione për shkyçje dhe ndalim të keqpërdorimit të ujit
KRU “Hidroregjioni Jugor” Sh.A. në Prizren ka bërë të ditur se ekipet e saj të kontrollës po vazhdojnë aksionet në terren edhe gjatë fundjavës, me fokus në shkyçjen e konsumatorëve që kanë obligime të papaguara, si dhe në parandalimin e keqpërdorimit të ujit të pijes.
Sipas njoftimit zyrtar, aksionet përfshijnë identifikimin dhe eliminimin e lidhjeve ilegale në rrjetin e ujësjellësit, me qëllim mbrojtjen e sistemit dhe garantimin e furnizimit të qëndrueshëm për të gjithë qytetarët.
Apel për pagesë dhe përdorim të përgjegjshëm
Kompania u ka bërë thirrje konsumatorëve që të përmbushin në kohë detyrimet financiare dhe të përdorin ujin e pijes në mënyrë të përgjegjshme, duke theksuar se kjo është e domosdoshme për stabilitetin e shërbimit publik.
Mundësitë e pagesës
Qytetarët mund t’i kryejnë pagesat përmes:
Arkave të kompanisë (08:00 – 19:00 gjatë ditëve të javës dhe 08:00 – 16:00 të shtunën)
Institucioneve mikrofinanciare të autorizuara
Platformës online E-HRJ, e cila funksionon 24/7
Nga kompania është theksuar se këto masa synojnë përmirësimin e shërbimit dhe ruajtjen e burimeve të ujit të pijes për të gjithë konsumatorët.
