Nga mbështetja për ish-krerët e UÇK-së te emërimet në BQK, çfarë ndodhi sot në Kuvend?
Kuvendi i Kosovës ka mbajtur sot seancën e radhës plenare, nën drejtimin e kryetares Albulena Haxhiu, ku janë shqyrtuar disa çështje parlamentare dhe janë marrë vendime për emërime në institucione të rëndësishme.
Gjatë seancës, kryeministri Albin Kurti, duke iu përgjigjur pyetjeve të deputetëve, ka bërë të ditur se Qeveria ka themeluar një Grup Punues për hartimin e strategjisë shtetërore për mbrojtjen e së vërtetës historike të luftës çlirimtare.
Kurti njoftoi se në projektbuxhetin e vitit 2027 do të përfshihet edhe mbështetja financiare për katër ish-krerët e Ushtrisë Çlirimtare të Kosovës, të cilët po gjykohen në Hagë.
Ai theksoi se fillimisht duhet të hartohet strategjia dhe të përcaktohen mekanizmat konkretë të veprimit, në mënyrë që kjo çështje të ketë mbështetje të gjerë institucionale dhe politike.
Në vijim të seancës, pas votimit të fshehtë, deputetët zgjodhën Bashkim Nurbojën dhe Nora Latifi-Jasharin anëtarë joekzekutivë të Bordit të Bankës Qendrore të Kosovës (BQK).
Ndërkohë, formimi i Komisionit Ad-Hoc për përzgjedhjen e katër anëtarëve të Bordit të Radiotelevizionit të Kosovës u shty për seancën e ardhshme, për shkak të mungesës së deputetëve të PDK-së, LDK-së dhe Aleancës.
Kuvendi miratoi gjithashtu në lexim të dytë Projektligjin për ndryshimin dhe plotësimin e Ligjit për Parandalimin e Pastrimit të Parave dhe Luftimin e Financimit të Terrorizmit, si dhe përkrahu propozimin e Listës Serbe për emërimin e deputetëve në komisionet parlamentare.
Në fillim të seancës, betimin si deputet i Kuvendit të Kosovës e dha edhe Ivica Ceniq nga Lista Serbe, i cili zëvendëson ish-deputetin Zlatan Elek.
