Morina merr përgjegjësi dhe kërkon falje: “Ylli do të rikthehet më i fortë sezonin e ardhshëm”
Kapiteni i Golden Eagle Yllit, Gëzim Morina, ka reaguar publikisht pas përfundimit të edicionit 2025/26, duke iu drejtuar tifozëve, donatorëve dhe gjithë komunitetit sportiv të Suharekës me një mesazh të sinqertë reflektimi, falënderimi dhe kërkimfaljeje.
Në fjalën e tij, Morina theksoi se skuadra e kishte nisur sezonin me entuziazëm të madh dhe objektiva të qarta për të arritur suksese edhe më të mëdha.
Ai vuri në pah se, ndonëse arritën të rikthejnë në Suharekë trofeun e Ligës mbarëshqiptare, pritjet për këtë edicion kanë qenë dukshëm më të larta, gjë që e bën zhgënjimin të pashmangshëm.
Duke marrë përgjegjësi si kapiten, Morina kërkoi falje në emër të tij dhe të bashkëlojtarëve për mosrealizimin e synimeve kryesore të klubit.
Ai shprehu mirënjohje të veçantë për tifozët besnikë “Xhebrailat”, si dhe për të gjithë donatorët dhe mbështetësit që qëndruan pranë ekipit edhe në momentet më të vështira.
“Ky sezon nuk shkoi sipas planit, por do të na shërbejë si motivim për t’u rikthyer më të fortë. Ylli duhet të jetë aty ku e meritojnë tifozët tanë”, u shpreh ndër të tjera Morina.
Në fund, kapiteni nënvizoi se Golden Eagle Ylli është më shumë se një klub – një familje e madhe që bashkon qytetin dhe tifozët e tij – duke falënderuar të gjithë për mbështetjen e vazhdueshme dhe besimin e dhënë edhe në kohë zhgënjimi.
