Mjegulla përfshin disa zona të Kosovës – Policia apelon shoferët për kujdes
Policia e Kosovës ka njoftuar se në disa zona të vendit ka filluar shfaqja e mjegullës, veçanërisht në vendet me pozitë më të ulët gjeografike dhe afër lumenjve, duke rritur rrezikun për pjesëmarrësit në komunikacion.
Shoferët këshillohen të jenë të kujdesshëm, pasi ngasja në mjegull mund të jetë shumë e rrezikshme për shkak të uljes së dukshmërisë dhe ndryshimeve të papritura në shikueshmëri.
Në njoftim, Policia u bën thirrje shoferëve të përdorin dritat e mjegullës dhe të shmangin ndezjen e dritave të gjata, të cilat reflektojnë dhe pengojnë dukshmërinë, duke rritur rrezikun për aksidente.
Autoritetet kujtojnë se mjegulla mund të krijojë iluzione optike, duke bërë që shoferët të mendojnë se po lëvizin më ngadalë se sa është realiteti. Prandaj, apelohet të mbahet shpejtësi e kontrolluar dhe e sigurt.
Këshillat e Policisë për shoferët gjatë mjegullës:
- Mbani ndezur dritat e shkurtra dhe dritat e mjegullës;
- Përdorni shpejtësi të kontrolluar;
- Qëndroni në vijën e djathtë të rrugës gjatë lëvizjes;
- Përshtatni ngasjen sipas kushteve atmosferike dhe qëndroni vigjilentë për të shmangur aksidentet.
Policia e Kosovës fton të gjithë shoferët që të tregojnë kujdes maksimal dhe të respektojnë këshillat për siguri në komunikacion gjatë periudhës kur mjegulla mbulon rrugët.
