Nata e kundërt për dy skuadrat kosovare: Malisheva pëson humbje të thellë, Prishtina fiton por eliminohet nga Europa League

Skuadra e Malishevës u përball me një mbrëmje të vështirë në Islandë, duke pësuar një disfatë të thellë 8-0 ndaj Vikingur Reykjavik në ndeshjen e kthimit të raundit të parë kualifikues për Ligën e Konferencës.

Pas humbjes minimale 1-0 në ndeshjen e parë, Malisheva nuk arriti të reagojë në përballjen e dytë, duke u dominuar plotësisht në të gjitha aspektet e lojës. Me një rezultat të përgjithshëm 9-0, kjo humbje shënon eliminimin e hershëm të Malishevës nga garat evropiane dhe është një nga disfatat më të thella në historinë e pjesëmarrjes së klubeve kosovare në Evropë.

Ndërkohë, në stadiumin “Fadil Vokrri” në Prishtinë, atmosfera ishte më e ndjeshme dhe plot emocione. Kryeqytetasit arritën të triumfojnë ndaj gjigantit moldav, Sheriff Tiraspol, me rezultat 2-1 në ndeshjen e kthimit të raundit të parë kualifikues të Europa League.

Sheriff kaloi në epërsi në minutën e 51-të me golin e Artur Serobyan, por Prishtina reagoi shpejt përmes Hamdi Namanit që barazoi pesë minuta më pas. Fitoren bardhekaltërve ia siguroi talenti 16-vjeçar, Rin Ahmeti, i cili shënoi një gol të bukur në minutën e 65-të.

Megjithatë, fitorja nuk ishte e mjaftueshme për të kaluar tutje, pasi Prishtina u mposht 4-0 në ndeshjen e parë. Me rezultat të përgjithshëm 5-2, klubi moldav kalon në raundin tjetër të Europa League.

Pavarësisht eliminimit nga Europa League, rrugëtimi evropian i Prishtinës nuk ka përfunduar. Në rrethin e dytë të Ligës së Konferencës, ata do të përballen me Larne FC, skuadër nga Irlanda e Veriut.

Ndërsa për Malishevën, mbyllet një debutim i hidhur në arenën ndërkombëtare, i cili do të kërkojë reflektim për të ardhmen e përfaqësimit në Evropë.