Itali, shqiptari ndalohet në kufi me gati 70 mijë euro të fshehura në makinë

Ngjarja ka ndodhur gjatë kontrolleve rutinë në vendkalimin e autostradës Como-Brogeda, ku ushtarakët e grupit Ponte Chiasso, së bashku me zyrtarë të Agjencisë së Doganave dhe Monopoleve, kanë ndaluar shqiptarin e lindur në vitin 1985. Fillimisht, ai ka deklaruar se mbante me vete vetëm 8000 euro, por agjitacioni i tij ka ngritur dyshime te autoritetet.

Pas një kontrolli më të detajuar të makinës, efektivët zbuluan një zgavër të fshehtë në ndarjen e dorezës, ku ndodheshin disa thasë celofoni me kartëmonedha të shumta, në euro dhe franga zvicerane, me një vlerë totale prej 69,280 euro.

Drejtuesi i mjetit është justifikuar duke thënë se po transportonte paratë për llogari të të tretëve dhe se destinacioni final ishte Shqipëria. Megjithatë, në përputhje me rregulloren e monedhës, autoritetet sekuestruan 70% të shumës së padeklaruar, duke konfiskuar 42,375 euro.

Hetimet mbi origjinën dhe destinacionin e parave vijojnë, ndërsa autoritetet po shqyrtojnë të dhëna të tjera mbi këtë rast.