Itali, arrestohet 47-vjeçari shqiptar, kapet me mbi 27 kilogramë kokainë
Policia italiane ka arrestuar një shtetas shqiptar, i lindur në vitin 1978, pasi u kap në flagrancë duke transportuar një sasi të madhe kokaine.
Arrestimi ndodhi në autostradën Messina–Katania, gjatë një kontrolli policor pranë pikës së pagesës në San Gregorio di Catania.
Gjatë kontrollit të automjeteve, policia ndaloi një veturë Renault Scenic ngjyrë gri. Sjellja e dyshimtë dhe mungesa e justifikimeve të besueshme të shoferit çuan në një inspektim të imtësishëm të mjetit. Si rezultat, nën sediljet e përparme – si në anën e shoferit, ashtu edhe të pasagjerit – u gjet një ndarje e fshehtë e përshtatur posaçërisht për transport.
Brenda saj ishin fshehur 24 blloqe kokaine, me një peshë totale prej 27.60 kilogramësh. Mes tyre, 7 blloqe mbanin logon “Bugatti”, me peshë 1.150 kg secili (totali 8.05 kg), ndërsa 17 blloqe të tjera kishin logon “Boss”, me peshë 1.150 kg secili (totali 19.55 kg).
Përveç drogës, policia sekuestroi edhe veturën e përdorur për transportin si dhe dy telefona inteligjentë të dyshuar se përdoreshin për komunikime të lidhura me aktivitetin e paligjshëm.
Shqiptari u arrestua menjëherë dhe, pas procedurave ligjore, u dërgua në burgun “Piazza Lanza” në Catania, ku do të qëndrojë në pritje të verifikimit të provave dhe zhvillimit të mëtejshëm të procesit gjyqësor.
