Itali, arrestohet 46-vjeçari shqiptar për pastrim parash: Sekuestrohen mbi 863 mijë euro cash
Një 46-vjeçar shqiptar është denoncuar për pastrim parash dhe transferim mashtrues vlerash nga Policia Financiare e Leçes në Itali, pas një operacioni që zbuloi një shumë të madhe parash të padeklaruara.
Autoritetet italiane sekuestruan një total prej mbi 863 mijë eurosh, të ndara në pako dhe të mbështjella në vakum, të cilat ishin të fshehura si në automjetin, ashtu edhe në banesën e tij.
Operacioni nisi kur financuesit ndaluan shqiptarin në rrugën shtetërore Brindisi-Lecce. Gjatë kontrollit të automjetit, ata zbuluan 330 mijë euro të fshehura në një zarf dhe të paketuara me kujdes. Ky zbulim çoi në një kontroll të detajuar në banesën e tij, ku u gjetën edhe 633 mijë e 850 euro të tjera, të ruajtura në një gardërobë.
Të gjitha kartëmonedhat ishin të prerjeve të ndryshme dhe të mbështjella në mënyrë që të shmangeshin dyshimet dhe transporti i tyre të ishte më i lehtë. Aktualisht, autoritetet italiane po hetojnë për të përcaktuar origjinën e këtyre parave dhe për të zbuluar nëse ka të tjerë të përfshirë në këtë aktivitet të dyshimtë.
Ky rast është një tjetër shembull i përfshirjes së individëve shqiptarë në skema të paligjshme në territorin italian, duke ngritur shqetësime për lidhjet me rrjete kriminale dhe aktivitetet e paligjshme në rajon. Hetimet pritet të hedhin më shumë dritë mbi këtë rast dhe të çojnë drejt identifikimit të çdo bashkëpunëtori të mundshëm.
