Itali, arrestohet 34-vjeçari shqiptar në kantier ndërtimi, përdori dokumente të falsifikuara për t’u punësuar

08.10.2025

Një operacion kontrolli nga Karabinierët e Inspektoratit të Punës në Rieti, me mbështetjen e personelit nga stacioni i Amatricës, ka çuar në arrestimin e një shtetasi shqiptar 34-vjeçar, i cili punonte në mënyrë të paligjshme në një kantier ndërtimi.

Inspektimi, i zhvilluar në kuadër të një aksioni të jashtëzakonshëm në sektorin e ndërtimit, kishte për qëllim verifikimin e respektimit të rregullave të sigurisë në punë dhe ligjshmërisë së punëtorëve në zonat e rindërtimit pas tërmetit të vitit 2016.

Gjatë kontrollit, karabinierët identifikuan disa punëtorë në një kantier afër Amatricës. Njëri prej tyre, 34-vjeçar me origjinë shqiptare, paraqiti një kartë identiteti rumune, duke pretenduar se ishte qytetar i Rumanisë. Megjithatë, oficerët vunë re parregullsi në elementët e sigurisë dhe shtypjes së dokumentit, çka ngriti menjëherë dyshime për falsifikim.

Pas verifikimeve të kryera nëpërmjet kanaleve ndërkombëtare të bashkëpunimit policor, u konstatua se dokumenti ishte i falsifikuar. I përballur me provat, shqiptari pranoi se kishte përdorur dokumentin e rremë për t’iu shmangur kontrolleve dhe për të punuar në mënyrë të paligjshme në Itali.

Ai u arrestua në flagrancë për posedim dhe përdorim të dokumenteve të falsifikuara dhe iu referua autoritetit gjyqësor kompetent për akuzat e falsifikimit material dhe deklarimit të rremë ndaj një zyrtari publik.

Pas përfundimit të procedurave ligjore, u urdhërua dëbimi i tij nga territori italian.