Prishtina dhe Ballkani sonte në mision evropian – vendoset fati i kualifikimit tutje në Ligën e Konferencës
Dy skuadrat kosovare, Prishtina dhe Ballkani, do të zhvillojnë sonte ndeshjet e kthimit të raundit të dytë në Ligën e Konferencës, me synim të qartë: kualifikimin në fazën tjetër të garës.
Skuadra kryeqytetase do të përballet me ekipin irlandez Larne në stadiumin “Fadil Vokrri”, me ndeshjen që nis nga ora 20:00. Prishtina vjen pas një barazimi pa gola në ndeshjen e parë në Irlandë dhe do të kërkojë fitore në shtëpi për të siguruar kalimin tutje.
Të besuarit e trajnerit Arsim Thaçi kanë treguar lojë të disiplinuar në udhëtim dhe tani shpresojnë në përkrahjen e tifozëve për të siguruar një kualifikim historik.
Ndërkohë, Ballkani udhëton drejt Maltës, ku do të përballet me Floriana FC. Ish-kampionët e Kosovës vijnë me një avantazh të rëndësishëm pas fitores 4-2 në ndeshjen e parë në Suharekë. Skuadra nga termocentrali ka nevojë për një barazim ose të shmangë një humbje me më shumë se dy gola diferencë për të siguruar kalimin në raundin tjetër.
Ndeshja mes Floriana FC dhe Ballkanit do të fillojë në ora 20:45.
Të dyja skuadrat janë të motivuara dhe në formë, duke synuar ta vazhdojnë rrugëtimin evropian dhe ta përfaqësojnë Kosovën denjësisht në arenën ndërkombëtare. Sytë e sportdashësve kosovarë sonte do të jenë të drejtuar nga këto dy përballje vendimtare.
