Përfundon afati kalimtar: KB Golden Eagle Ylli rikthen Jan Palokaj
Ka përfunduar afati kalimtar për basketbollistët vendorë në ProCredit Superligën e Kosovës, dhe klubet kanë qenë jashtëzakonisht aktive, duke bërë lëvizje strategjike për të përforcuar radhët e tyre për stinorin pranveror, i cili pritet të jetë vendimtar.
Golden Eagle Ylli ka rikthyer në radhët e tij Jan Palokaj, një emër i njohur për tifozët e klubit. Rikthimi i tij pritet të forcojë ndjeshëm formacionin e ekipit.
Sigal Prishtina
Sigal Prishtina ka siguruar dy përforcime të rëndësishme: Fatlind Shoshaj, i cili vjen nga Belgjika dhe ka një të kaluar në Pejë, si dhe Norik Binqen nga Bora. Përveç këtyre, klubi ka dorëzuar kërkesë për transferimin e Renat Sylemanit, duke synuar që të konsolidojë më tej ekipin.
Trepça
Kampionët aktualë, Trepça, kanë sjellë në ekip Michael Myers, i cili më herët ka luajtur në Turqi. Myers pritet të jetë një shtyllë kryesore në përpjekjet e klubit për të mbrojtur titullin kampion.
Proton Cable Prizreni
Klubi prizrenas ka bërë disa transferime të mëdha, duke përfshirë Rron Dahsylën nga Peja dhe Drilon Shalën nga Golden Eagle Ylli. Përveç tyre, nga Peja është afruar edhe amerikani Terrell Beck, i cili premton të sjellë dinamikë dhe përvojë në lojën e ekipit.
Bora
Bora ka qenë një tjetër ekip aktiv në merkato, duke përforcuar radhët me tre basketbollistë të njohur në ligën vendore. Skuadra prishtinase ka transferuar Musab Mala nga Peja, Henrik Sirko nga Sigal Prishtina dhe Desmond Cambridge nga Trepça.
Peja
Peja ka shtuar në ekip brazilianin Tulio Da Silva, një lojtar me potencial të madh, si dhe Blend Matoshin nga Bora. Ky kombinim pritet të rrisë fleksibilitetin dhe forcën e skuadrës në stinorin pranveror.