Itali, arrestohen 4 shqiptarë për trafik droge, baza logjistike në Bari gjeneronte mbi 1 milion euro në muaj
Një goditje e fortë kundër trafikut ndërkombëtar të drogës është realizuar në Itali nga Karabinierët e Barit dhe Barletës, duke shkatërruar një shoqatë kriminale që gjeneronte mbi një milion euro në muaj.
Operacioni i datës 3 dhjetor, çoi në arrestimin e 8 personave (4 italianë dhe 4 shqiptarë), të moshës 34 deri në 49 vjeç, si rezultat i një urdhri të kujdestarisë.
Sipas hetimeve të kryera nga DDA e Barit, kjo organizatë kriminale kishte krijuar një sistem të mirëstrukturuar të trafikut të drogës, duke u furnizuar me sasi të mëdha kokaine dhe marihuanë nga Shqipëria, Spanja dhe disa vende të Europës Veriore. Droga transportohej në Pulia për shpërndarje në rajon dhe zona të tjera të Italisë, përfshirë lagjen famëkeqe Scampia të Napolit, me ndihmën e organizatave lokale.
Hetimet zbuluan se qendra operacionale e grupit ndodhej në Shqipëri, ku kryhej koordinimi i aktiviteteve. Trafikantët shqiptarë u identifikuan si anëtarët kryesorë të grupit, duke menaxhuar rrugët ndërmjet Shqipërisë dhe Pulias dhe duke konsoliduar një rrjet logjistik të fuqishëm për trafikun e drogës.
Bazat kryesore të operacioneve të grupit ndodheshin në qytetet Barletta, Modugno (Bari) dhe Mola di Bari. Droga ruhej në magazina dhe më pas shpërndahej tek klientët kryesorë për të depërtuar më tej në tregjet e shitjes. Përfitimet e konsiderueshme nga ky aktivitet kriminal transferoheshin në Shqipëri.
Gjatë hetimeve janë sekuestruar mbi 15 kilogramë kokainë, 2 kilogramë marihuanë, armë zjarri, municione të kalibrave të ndryshëm dhe 15 mijë euro cash, që besohet se janë të ardhura nga trafiku i drogës.
Operacioni nisi pas një incidenti të dhunshëm në tetor 2022, kur një shtetas maroken u godit me thikë në Viareggio (Lucca). Ky incident zbuloi një rrjet të gjerë trafiku ndërkombëtar droge, me rrugë që përfshinin Spanjën, Belgjikën dhe Gjermaninë.
Karabinierët theksuan rëndësinë e bashkëpunimit ndërkombëtar në këtë operacion, duke evidentuar përkushtimin për të luftuar kriminalitetin e organizuar dhe për të ndalur fluksin e drogave që shkatërrojnë komunitetet. Hetimet pritet të zbulojnë edhe detaje të tjera mbi funksionimin e kësaj organizate dhe lidhjet e saj ndërkombëtare.