LDK- Suharekë: “Ne jemi gati”

Në një takim të përbashkët të kryesisë me kryetarët e nëndegëve, kryetari i degës, Dr. Ardian Shala, ka informuar të pranishmit për të gjitha përgatitjet e nisura për këto zgjedhje. Ai ka kërkuar angazhimin e të gjitha strukturave të degës për të komunikuar me çdo qytetar dhe për të përgatitur së bashku ofertën më të mirë për fitoren e LDK-së në zgjedhjet lokale.

Gjatë takimit, kryetari Shala ka njoftuar gjithashtu për kërkesat e vazhdueshme për t’u bashkuar me LDK-në. Ai ka mirëpritur publikisht aderimin e fundit të Naser Jupajt, kryetarit të nëndegës së AAK-së në Studençan, i cili ka deklaruar bashkimin me vizionin e LDK-së. Shala ka shtuar se edhe ditë më parë kanë pranuar figura të tjera që tashmë janë pjesë e rrugëtimit të tyre drejt fitores.

Kryetari Ardian Shala ka theksuar se Lidhja Demokratike e Kosovës, dega në Suharekë, i ka dyert e hapura për çdo qytetar që dëshiron t’u bashkohet në atë që ai e quan “rrugëtimin tonë historik për rikthimin e madh të LDK-së në zgjedhjet lokale”.