Urdhërarrest për Remzi Shalën!

Gjykata Themelore në Prizren ka lëshuar një urdhër-arrest ndërkombëtar për ish-pjesëtarin e Ushtrisë Çlirimtare të Kosovës (UÇK), Remzi Shala, i njohur me nofkën e luftës si “Molla e Kuqe”.

Shala kishte munguar në seancën e 9 janarit në Gjykatën Themelore Prizren në gjykimin rreth vrasjes së Haxhi Perteshit në vitin 1998.

Mungesa e tij e shtyri trupin gjykues që lëshojë urdhër që Shala të sillet me Polici në gjykatë.

Pasi që fillimisht gjyqtarja kishte lëshuar urdhëresë, për Policinë e Kosovës, që për Remzi Shalën të kërkojnë informacione shtesë për vendndodhjen e tij, Policia nuk kishte arritur ta gjente e as të siguronte informacione shtesë për vendndodhjen e tij.

Remzi Shala është duke u gjykuar për krime lufte në lidhje me rrëmbimin e Haxhi Perteshit nga Duhla e Suharekës, i cili pak ditë më vonë ishte gjetur i vdekur.

Gjykimi është duke u zhvilluar në Gjykatën Themelore të Prizrenit.

Në seacën e paraparë për 9 Janar, Remzi Shala është planifikuar të japë mbrojtjen e tij, dhe do të jepej fjala përfundimtare, andaj kishte gjasa që me paraqitjen e Remzi Shalës, rasti edhe të merrte epilogun edhe para datës 17 janar.

Por, Natal Bullakaj, avokati i Remzi Shalës, ka deklaruar se nuk ka asnjë kontakt me Shalën, dhe se nuk e ka parë që nga muaji dhjetor kur e ka pranuar ftesën për Gjykatë Speciale.

“Ku ka ikur dhe si ka ikur vetëm ai e di, ngase nga muaji dhjetor kur edhe kishte pranuar ftesën për t’u intervistuar në Gjykatën Speciale, më nuk kam pasur kontakt me të, por as edhe askush nga familja e tij nuk ka dijeni se ku gjendet”, tha avokati Bullakaj.

Shala, i cili gjatë luftës mbajti nofkën “Molla e Kuqe”, në dhjetor kishte pranuar ftesë që më 17 janar të intervistohet në Hagë nga ana e prokurorëve të Gjykatës Speciale.

Siç ishte raportuar Shala nuk ishte paraqitur në seancë ku do të duhej ta jepte mbrojtjen e tij, kurse avokati i tij Natal Bullakaj ishte prezent në seancë, ai ka thënë se një gjë të tillë e ka bërë për t’i njoftuar për vendimin për bojkot nga Oda e Avokatëve.