Një numër i qytetarëve të Komunës së Suharekës janë mbledhur para zyreve të KEDS-it në shenjë pakënaqësie ndaj ndërprerjeve të shpeshta të energjisë elektrike.

Sipas protestuesve komuna jonë po përballet me ndërprerje të vazhdueshme të energjisë elektrike jo vetëm gjatë javës së kaluar por gjatë gjithë muajve kalendarik. Mungesa e energjisë elektrike po shkakton shumë dëme në secilën pjesë të komunës sonë duke llogaritur edhe humbjet e bizneseve tona të cilat po ballafaqohen me reduktime të ashpra nga ana e KEDS-it.

Si qytetarë të këtij vendi ne po kërkojmë përkujdes të barabartë me të gjithë qytetarët tjerë, duke përmendur faktin se jemi ndër komunat më aktive në përmbushjen e obligimeve ndaj kësaj kompanie, u tha ndër tjera në komunikatën e protestuesve.

Ndër tjerash organizatorët shprehën pakënaqësi për mos pjesmarrjen e kryetarit të Komunës, Bali Muharremaj.

” Na vjen mirë kur shkruan postime në lidhje me këtë çështje të rëndësishme, mirëpo do të ishte më e arsyeshme të ishe pjesë e këtij tubimi paqësor i cili kishte për qëllim vetëm: Përgjegjësinë dhe llogarinë e ” Keds Energy ” për ndalesat e shpeshta e të vazhdueshme të energjisë elektrike. Populli përmbi të gjitha!”