PSG shkatërron Real Madridin me një fitore historike 4-0 dhe siguron finalen e kupës së botës për klube.

Ndeshja, e cila u zhvillua në një atmosferë elektrizuese në stadiumin MetLife në Nju Jork, pa një dominim absolut nga skuadra franceze, e cila tani përgatitet për një finale epike kundër Chelseat.

Ekipi i drejtuar nga Luis Enrique tregoi një lojë të jashtëzakonshme, duke mos i lënë asnjë hapësirë kundërshtarit të tyre historik. Që në minutat e para, PSG vendosi një ritëm të lartë, duke e vënë në vështirësi të vazhdueshme mbrojtjen e Real Madridit.

Serinë e golave e hapi sulmuesi anësor Ousmane Dembélé me një finalizim të saktë, i cili shfrytëzoi një gabim në prapavijën madrilene. Pak minuta më vonë, mesfushori spanjoll Fabián Ruiz dyfishoi avantazhin me një goditje të fuqishme nga distanca, duke lënë të shtangur portierin dhe tifozët e “Los Blancos”.

Pjesa e dytë vazhdoi me të njëjtin ritëm, me PSG-në që kontrollonte plotësisht lojën. Ruiz ishte sërish protagonist, duke shënuar golin e tretë për skuadrën e tij dhe të dytin personal pas një kundërsulmi të shpejtë dhe një kombinimi perfekt me shokët e skuadrës. Për të vulosur fitoren historike mendoi Gonçalo Ramos, i cili shënoi golin e katërt, duke shuar çdo shpresë për një rikthim të mundshëm të Real Madridit.

Kjo humbje e thellë do të mbetet gjatë në kujtesën e Real Madridit, ndërsa për PSG-në ky triumf është një demonstrim force dhe një paralajmërim për të gjithë rivalët. Fitorja 4-0 jo vetëm që i siguron atyre një biletë për finalen e madhe të së dielës, por gjithashtu rrit moralin dhe besimin e skuadrës në prag të ndeshjes më të rëndësishme të turneut.

Tashmë, të gjithë sytë janë drejtuar nga finalja e madhe, ku Paris Saint-Germain do të përballet me gjigantët anglezë të Chelseat. Pritet një betejë titanësh për titullin e kampionit të botës për klube, me PSG-në që hyn në këtë përballje si favorite pas paraqitjes spektakolare kundër Real Madridit.