Zjarri shkatërron plotësisht diskotekën Zoom Club në Prizren, Sedolli: Dëmi rreth 800 mijë euro

Ngjarja ka ndodhur disa ditë pas hapjes së diskotekës, duke shkaktuar një dëm material të konsiderueshëm, por për fat të mirë pa lënduar askënd. Policia e Kosovës ka konfirmuar se ka nisur hetimet për të zbuluar shkakun e këtij zjarri dhe për të identifikuar autorët e mundshëm, nëse ka të tillë.

Pronari i diskotekës, Burim Sedolli, i cili zotëron edhe një lokal tjetër nate në Suharekë, ka deklaruar se nuk ka asnjë dyshim për personat që mund të kenë qenë të përfshirë në këtë incident, duke theksuar se nuk ka pasur probleme me askënd.

“Nuk kam asnjë dyshim te askush, pasi nuk kam pasur asnjë incident me kënd. Nuk e di se çfarë mund të ketë ndodhur”, ka thënë Sedolli për gazetën Sinjali.

Ai ka treguar se objekti ishte marrë me qira vetëm dy muaj më parë dhe se pas mbrëmjes së parë të hapjes, më 27 dhjetor, ka ndodhur ky incident i rëndë. Sedolli ka shtuar se tentativa të ngjashme janë regjistruar edhe në diskotekën e tij në Suharekë, duke ngritur dyshime për një motiv të përbashkët.

Dëmet materiale shkaktuar nga zjarri janë vlerësuar në rreth 800 mijë euro, ndërsa investimi i pronarit në këtë objekt kap shifrën e 200 mijë eurove.

Hetimet për zbardhjen e këtij rasti janë në vazhdim dhe policia po punon për të identifikuar shkakun e zjarrit dhe për të përjashtuar asnjë mundësi, duke përfshirë edhe atë të një akti vandalizmi.