Superliga e Kosovës: Malisheva ndal Dritën, Llapi fiton në Gjilan pas një drame me pesë gola

Në stadiumin “Liman Gegaj” në Malishevë, skuadra vendase shënoi fitore të madhe ndaj Dritës me rezultat minimal 1-0. Goli i vetëm i ndeshjes u realizua në fundin e pjesës së parë nga Besnik Ferati, i cili i siguroi tri pikë të rëndësishme ekipit të tij në luftën për kreun e tabelës.

Në takimin tjetër të javës, që u zhvillua në stadiumin e Gjilanit, vendasit u mposhtën nga Llapi me rezultat 2-3, në një sfidë të mbushur me gola dhe emocione. Pjesa e parë nuk solli gola, por pjesa e dytë shpërtheu me pesë realizime.

Basa hapi serinë e golave për Gjilanin në minutën e 63-të, por mysafirët nga Podujeva reaguan shpejt. Tahiri barazoi rezultatin në minutën e 72-të, e më pas Hasani përmbysi gjithçka në të 78-tën. Gjilani nuk u dorëzua dhe barazoi në minutën e 86-të, por në kohën shtesë, sërish ishte Tahiri që vulosi fitoren për Llapin, duke i dhënë skuadrës së trajnerit Tahir Batatina një triumf të rëndësishëm jashtë fushe.

Pas këtyre rezultateve, Drita mbetet në krye të tabelës me 60 pikë, megjithatë diferenca ngushtohet nga ndjekësit. Ballkani mban vendin e dytë me 50 pikë, i pasuar nga Malisheva që ngjitet në pozitën e tretë me 47 pikë. Gjilani mbetet në vendin e pestë me 38 pikë, ndërsa Llapi ngushton diferencën në fundin e tabelës, duke u pozicionuar në vendin e tetë me 33 pikë.

Superliga vazhdon me luftë të ashpër si për titullin kampion, ashtu edhe për mbijetesën, duke premtuar një fund sezoni emocionues për adhuruesit e futbollit kosovar.