Suharekë, shënon rritje numri i pensionistëve të cilët marrin pension bazik të moshës

Agjencia e Statistikave të Kosovës (ASK) ka publikuar Statistikat e Mirëqenies Sociale për muajin nëntor 2022.

Ky publikim ofron të dhëna për numrin e përfituesve nga skema e pensioneve bazë të moshës.

Çfarë është pensioni bazik i moshës?

Pensioni bazik i moshës – pensioni minimal i rregullt mujor të paguar për të gjithë qytetarët e Republikës së Kosovës, që kanë mbushur moshën 65 vjeçare, pa marrë parasysh, a kanë qenë të punësuar apo jo dhe të cilët i plotësojnë kriteret e parapara me këtë ligj.

Pensioni bazik i moshës iu paguhet të gjithë personave që janë shtetas të përhershëm të Republikës së Kosovës, të cilët posedojnë dokumentet e identifikimit dhe të cilët kanë mbushur moshën 65 vjeçare.

Në bazë të statistikave nga ASK të cilat posedon SuharekaOnline bëhet e ditur se numri i personave që janë përfitues nga skema e pensioneve bazë të moshës nga muaji në muaj kanë qenë të ndryshme.

Sipas statistikave të ASK rezulton se gjatë muajit nëntor të këtij viti në Komunën e Suharekës kanë përfituar 4.588 persona.

Duke krahasuar këtë numër me atë të muajve të kaluar, figuron se numri i personave që marrin pensione në bazë të moshës nga muaji në muaj është rritur.