Suharekë, pranon fajësinë i akuzuari se e ka lënduar bashkëshorten pas mosmarrëveshjes që kishin pasur

Në seancën fillestare të mbajtur të mërkurën në Gjykatën Themelore në Prizren, dega në Suharekë, pas leximit të aktakuzës nga prokurori Atnor Skoro, i akuzuari e ka pranuar fajësinë.

“E ndjej veten fajtor për veprën penale e cila më vihet në barrë, në të gjitha pikat e aktakuzës, duke u penduar për veprën, ndërsa veprime të tilla ose të ngjajshme nuk do të përsëriten”, ka deklaruar A.L.

Pranimi i fajësisë nga ana e të akuzuarit nuk u kundërshtua nga prokurori Skoro, e më pas u aprovua nga gjykatësi Qemail Suka, raporton “Betimi për Drejtësi”.

Me qëllim të dëgjimit të të dëmtuarës E.I. gjyqtari Suka seancën dëgjimore e ka caktuar ditën e nesërme, në orën 9:20.

Sipas aktakuzës, më 22 shkurt 2021 rreth orës 19:00, në Suharekë, në shtëpinë e tij familjare, me dashje, i shkakton lëndime të lehta trupore të dëmtuarës- bashkëshortes së tij E.I, në atë mënyrë që pas një mosmarrëveshje paraprake me të pasi që e njëjta e kishte parë një SMS që bashkëshorti ia kishte dërguar motrës së tij me fjalë të këqija ndaj të dëmtuarës. Si pasojë i akuzuari i revoltuar e sulmon fizikisht të dëmtuarën, duke e goditur me shqelma e grushta, duke i shkaktuar lëndim të lehtë trupor.

Me këto veprime i pandehuri akuzohet se ka kryer veprën penale: “Lëndim i lehtë trupor” nga neni 185 paragrafi 3, nënparagfi 1.3 i Kodit Penal të Republikës së Kosovës. /BetimipërDrejtësi