Suhareka vazhdon në zonën e gjelbër, këto janë masat kufizuese

Ministri i Shëndetësisë, Armend Zemaj më 18 dhjetor kishte njoftuar për kategorizimin e komunave sipas rrezikshmërisë së infektimit nga COVID-19.

E sipas këtij kategorizimi Komuna e Suharekës ka kaluar në zonën e gjelbër, shkruan SuharekaOnline.

Masat kufizuese për këtë zonë janë më të lehta, të cilat mund t’i lexoni më poshtë:

• Operatorët ekonomikë lejohen të punojnë nga ora 05:00 deri në orën 20:00, në përputhje me “Manualin për mbrojtjen nga përhapja e COVID-19;
• Transporti publik lejohet të punojë duke shfrytëzuar deri në 50% të kapaciteteve, në përputhje me “Manualin për mbrojtjen nga përhapja e COVID-19;
• Taksitë lejohen të punojnë me një (1) pasagjer prapa ose deri në tre (3) nëse janë anetarë të së njëjtës familje, në përputhje me “Manualin për mbrojtjen nga përhapja e Covid19”;
• Qendrat tregtare lejohen të punojnë nga ora 05:00 deri në orën 20:00, në perputhje me “Manualin për mbrojtjen nga përhapja e COVID-19;
• Veprimtaria e hotelerisë dhe gastronomisë ndalohet pas orës 20:00, përveç shërbimit “merr me vete” dhe “porosi me dërgesë”;
• Lejohen pjesërisht aktivitetet kulturore të institucioneve vartëse të MKRS dhe komunave (teatrot, bibliotekat, filarmonia, galeritë, ansamblet, baleti, kinematë, qendrat rinore, muzetë, qendrat e kulturës me grupe dhe të ngjashme), duke shfrytëzuar vetëm 30% të hapësirës/sipërfaqeve të objekteve përkatëse për të gjitha aktivitetet (si në shfaqje ashtu edhe në ushtrime), në perputhje me “Manualin për mbrojtjen nga përhapja e COVID-19”;
• Lejohen aktivitetet sportive në hapësira të mbyllura dhe të hapura; stërvitjet dhe garat mund të organizohen në sportet individuale; gjatë stërvitjeve në hapësirat e mbyllura mund të marrin pjesë deri në 20 persona, ndërsa gjatë garave mund të marrin pjesë deri në 50 persona bazuar në protokolle dhe udhëzime vendore dhe ndërkombëtare sportive, në perputhje me “Manualin për mbrojtjen nga përhapja e COVID-19”;
• Lejohen fitneset dhe pishinat e mbyllura për aktivitete individuale rekreative duke shfrytëzuar vetëm 40% të hapësirave/sipërfaqeve, në perputhje me “Manualin për mbrojtjen nga përhapja e COVID-19”.

Ndryshe, në Komunën e Suharekës që nga dita e hënë deri më sot janë regjistruar vetëm 7 raste dhe është raportuar për një viktimë.

Gjithashtu, gjatë ditës së sotme në Seancën e Asamblesë Komunale në Suharekë është vendosur që të ndahen nga 100 euro për secilin person të prekur nga COVID-19 dhe nga 200 euro për familjet të cilat kanë pasur viktima nga COVID-19.