Suhareka shënon Ditën Botërore të Hipertensionit me aktivitete vetëdijësuese në sheshin “Fadil Vataj”

Aktivitetet janë mbajtur në sheshin “Fadil Vataj”, ku qytetarëve u janë ofruar shërbime falas të matjes së tensionit të gjakut, këshillime mjekësore dhe informacione edukuese për një stil jetese të shëndetshëm. Ekipet profesionale të QKMF-së ishin të pranishme për të ndarë njohuritë e tyre dhe për të ndihmuar qytetarët të kuptojnë më mirë rreziqet që sjell hipertensioni, si dhe mënyrat efektive për ta mbajtur atë nën kontroll.

“Qëllimi i këtij organizimi është vetëdijesimi i qytetarëve për rëndësinë e monitorimit të rregullt të tensionit të gjakut dhe ndërmarrjen e hapave të duhur për ta parandaluar ose menaxhuar në kohë”, thanë përfaqësuesit e QKMF-së.

Në kuadër të këtij aktiviteti, qytetarët patën mundësinë të diskutojnë drejtpërdrejt me profesionistët e shëndetit për faktorët e rrezikut si ushqyerja e pashëndetshme, mungesa e aktivitetit fizik, konsumimi i duhanit dhe stresi i përditshëm, të cilët kontribuojnë në zhvillimin e hipertensionit.

Organizimi i këtyre aktiviteteve është pjesë e përpjekjeve të vazhdueshme për të promovuar shëndetin publik dhe parandalimin e sëmundjeve kardiovaskulare, të cilat mbeten një nga shkaqet kryesore të vdekshmërisë në nivel global.

Dita Botërore e Hipertensionit shënohet çdo vit më 17 maj, me qëllim rritjen e ndërgjegjësimit për këtë “vrasës të heshtur” dhe rëndësinë e diagnostikimit dhe trajtimit të hershëm.