Shtyhet seanca gjyqësore ndaj dy policëve nga Suhareka të akuzuar për keqtrajtim gjatë ushtrimit të detyrës zyrtare

Shtyhet seanca gjyqësore ndaj dy policëve nga Suhareka të akuzuar për keqtrajtim gjatë ushtrimit të detyrës zyrtare

Mungesa e njërit zyrtar policor, ka bërë që të shtyhet seanca gjyqësore në çështjen ku zyrtarët policor B.K. dhe F.P. akuzohen se në bashkëkryerje, kanë keqtrajtuar një qytetarë gjatë ushtrimit të detyrës zyrtare ose autorizimeve publike.

Të pranishëm në seancë kanë qenë prokurori Ramadan Koro, i akuzuari B.K., i dëmtuari B.Sh. dhe mbrojtësi i tij avokati Sehad Haliti si dhe dëshmitari S. B.

Sa i përket të të akuzuarit F.P., pavarësisht që i njëjti ka qenë i ftuar në mënyrë të rregullt, mungesën nuk e ka arsyetuar.

Gjyqtari i çështjes Lavdim Bajraktari seancën e shqyrtimit gjyqësor e ka shtyrë për datën 30 prill 2021 në orën 9:00.

Ndryshe, sipas aktakuzës së Prokurorisë Themelore në Prizren, B.K. dhe F.P., akuzohen se më 7 mars 2018, në fshatin Mushtisht të Komunës së Suharekës, në një pikë kontrolli, si persona zyrtar të cilët duke e keqpërdorur detyrën zyrtare apo autorizimet e tyre, e keqtrajtojnë, frikësojnë, fyejnë rëndë dinjitetin e personit tjetër, në atë mënyrë që derisa të pandehurit kanë qenë në detyrë, e ndalin të dëmtuarin B.Sh. për shkak të kundërvajtjes në trafik dhe gjatë shqiptimit të kundërvajtjes dhe mosmarrëveshjes që lind gjatë kësaj, i pandehuri B. K. e fut dorën në automjet duke ia fikur atë dhe e godet të dëmtuarin me grushta disa herë në fytyrë, ndërsa i pandehuri F.P. futet nga mbrapa në veturë të të dëmtuarit dhe e godet me grushta në kokë dhe fytyrë, duke i shkaktuar lëndime të lehta trupore, transmeton Betimi Për Drejtësi.

Me këto veprime, akuzohen se në bashkëkryerje  kanë kryer veprën penale “keqtrajtim gjatë ushtrimit të detyrës zyrtare ose autorizimeve publike” nga neni 198 paragrafi 1 lidhur me nenin 31 të KP-së.

RAPORTO